हळवे मन

हळवे मन 

मन  हे  माझे  हळवे  झाले 
काय करावे  समजेना ?
हळव्या  माझ्या  मनाला 
काय  करावे  उमजेना ?


परमेश्वराची  काय  ही  दृष्टी 
बनवली  ही  सुंदर  सृष्टी 
फळे - फुले  अन किलबिल  पाखरे 
रंगीबेरंगी  ती  फुलपाखरे 
निसर्गरम्य  त्या  दुनियेचा  अर्थ  मला  कळेना ?


वर्षातील  हे  तीन  ऋतू 
उन्हाळा , पावसाळा  अन  हिवाळा 
चातक  पक्षाची  ती  प्रतीक्षा 
अन  कोकीळ  पक्षाचा  तो  मंजुळ  गळा 
पाखरांच्या  त्या  गुणगुणण्याचा  अर्थ  मला  कळेना ? 


सूर्याची  ती  प्रखर  किरणं 
अन  चंद्राचं  ते  शितल  असणं 
आकाशाचं  विराट  दिसणं 
अन  नभी  चमचमतं  चांदणं 
प्रखर  अन  शितल  किरणांचा  अर्थ  मला कळेना ?


अफाट  या  सृष्टीची  काया 
अवाढव्य  त्या  वृक्षाची  छाया 
इवल्याशा  पिलाच्या  चोचीतील  दाणा 
अन  मुक्या  पशु -पक्षांची  माया 
मुक्या  जीवांच्या  जगण्याचा  अर्थ  मला  कळेना ?


नाट्यरूपी  हे  क्षणभर  जीवन 
प्रत्येकजण  जगती  आपले  आपण 
जीवनाच्या  वाटेवर  कोणाला  मिळे  कधी  सुख 
तर  दुःखी  होते  कधी  कोणाचे  मन 
सुख - दुःखाच्या  या  धाग्यांचा  अर्थ  मला  कळेना ?


प्रत्येकाच्या  जीवनाची  दोरी 
आहे त्या  परमेश्वराच्या  हाती 
जोपर्यंत  आहे  त्याच्या  हाती 
तोपर्यंत  जगायची  आगळी - वेगळी  नाती 
मानवरूपी  जीवनाच्या  कथेचा  अर्थ  मला  कळेना  ?
                                  ----- संध्या  गडगे  - सिन्नरकर